里奧叔叔的台灣創業路《2》
財不入急門，投資生意急進係大忌
有好多朋友話台灣生意難做，又話台灣人唔鐘意洗錢，又話網購太流行開鋪無咩用，其實又係咪真系咁了解呢？
好多人為左投資移民，又唔知睇埋D咩報導，日日推介港人移民開餐廳幾掂，一堆又一堆香港移民黎到又開茶餐廳、冰室咁，開張時又剪采又舞龍舞獅，但攞完身份證之後又話生意好到管唔掂要轉手頂讓🤣🤣，真係咁掂？
聽人講就不如自己了解，其實每一個行業都一定有成功既機會，但正所謂力不到不為財，做生意要親力親為就係人都知，但里奧叔叔講既「力」唔係勞力，而係腦力同眼力先啱。
上文提到里奧叔叔嚟到hea 做一年了解台灣再落實投入營運，呢招好多人話里奧已經唔work ，因為新政策已經唔比你等，開鋪請人要你一步到位，大家唔好急，有關呢個問題遲D講到營運法規時再分享，首先 里奧叔叔認為做生意既目的為賺錢，有人賺錢為生活，有人做生意為發展，門生意有盈利就請咩人都得，蝕住做仲要請人就真系入曬肉，但都要靠自己去深入了解先。
講翻里奧叔叔自己先，第一年里奧叔叔做過咩呢？嚴格嚟講係咩都冇做過，每日生活正常過，但從生活中就每日都去了解台灣市場需要D乜？
一個簡單例子，里奧叔叔朝早送完兩個小朋友返學就會同老婆去食唔同既早餐，嘩…早餐店生意咁好既，仲有D早餐店一週只開6日，12點後就收工，正常心態都會覺得點解唔做埋午市或晚市，里奧記得當時感覺覺得台灣人好懶，點解唔做多D呢？既然咁有空間，可以認真諗下喎。
嗱…呢個就係同香港市場既唔同，之後里奧叔叔就好鐘意去呢種只做到中午既餐廳，食到同老闆熟落就傾下計八卦一下，台灣人好熱情「特別在南台灣」，熟落後傾咩講咩都得，佢地都好樂意分享又識多個朋友，食早餐之餘又計下佢條數，租金可以估計，人手有幾多位又可以計到成本，經過幾星期調查後，你地又估下最後里奧叔叔有投資開早餐店嗎？
最後就………緊係冇開早餐店啦🤣🤣，點解？
因為我眼見好生意，但計落去條數並唔好賺，一隻荷包蛋都賣$10台幣，嘩…用地溝油都蝕埋比你啦，如果就憑初覺就走去投資，開間鋪閒閒地200萬台幣，如果營運中要蝕錢，條數就真係有排計，蝕緊錢都仲要請2個員工，咁匯過黎果600萬可能好快就玩完😁😁
咁就白白浪費左里奧叔叔幾個星期？非也，系幾個星期幫我賺翻個否決決定先啱，睇黎開餐廳唔啱里奧叔叔。
咁之後點？咁咪繼續hea住睇下有咩啱自己做囉。
待續…………台灣的零售好做嗎？
想聽里奧分享多D有關我既台灣創業路同生活
🇹🇼請大家分享出去啦🇹🇼
#歡迎留言支持
#里奧叔叔的台灣創業路
#移民台灣
#投資移民
#新政策問題唔洗急
Search